《一百分》
劉華當年講：「今時今日呢種服務態度唔夠。」呢句野害咗幾多服務性行業從業員，但早排我終於遇到一個從呢句說話中得到新啟發。
後生好少會去酒樓食飯，但年紀大，親朋戚友多嘅情況下，中餐都係一種唔錯嘅選擇，而每種重要嘅飯局，我都會選擇去某一間酒樓，搵指定嘅部長。
作為一間唔平嘅酒樓，服務一定唔會差，起碼唔會叫極人都唔會嚟，餐具餐牌要叫先俾，基本服務都夠晒數，絕對無一百分都有九十分，但呢個部長令我覺得係度食飯，多咗一份放心。
第一次去食時，兩個人叫得太多野食，最後食唔晒，部長佢主動過嚟問需唔需要打包，咁當然好啦，唔知你有冇打包嘅經驗，因為食物盒同膠袋要錢，所以通常都係拎一套比你，自己想點夾就點夾，而呢位部長佢拎咗幾個大細嘅盒，將濕同乾分開，唔同味嘅餸分開，佢見到有一份菜淨得特別多，仲會問，呢道菜係咪唔啱口味，需唔需要帶走。
最後將所有野都放好，分咗三個盒，仲話盒係可以放微波爐，可以直接叮完就食，拎走個吓，有種感覺返去食唔晒好似會辜負咗呢份心機咁。
第二次去食時，由於第一次食個陣問有乜湯時我都係會問老婆想飲乜，第二次開始揀餸佢已經會直接同我老婆講有乜選擇，而唔需要等我再請示，某種份量比較大嘅菜式，佢都會同我哋講以我地食量未必食得晒，最後如果食唔晒，佢都唔會再問打唔打包，而係自動波咁做。
第三第四第五次之後，某程度佢仲比我清楚我老婆口味，平時老婆佢好似有選擇困難咁，但去佢度我基本上就會交比佢哋解決，自己煩少樣不知幾開心；而佢都會推薦菜式，唔係今日餐廳要推嘅海鮮或者湯，而係清楚口味咁去幫我哋推薦，佢之前提過而無揀嘅，基本上都無聽佢再提過，直到我哋主動去點呢樣食物佢先會再將呢樣野放返出嚟。
如果服務有份答卷，以一百分為滿分，佢絕對做足之餘，仲遠超過一百分。
我深信每間公司都會有服務指引，即係譚仔咁，阿姐一定會覆單，一定會講歡迎光臨，上菜會重覆一次確認咁，我會覺得呢樣野係一百分，因為佢做完自己份內嘅事，而我亦記得好耐之前譚仔有個阿姐好認得我同另一個朋友，基本上我哋食親都差唔多，佢記得晒之餘仲會係我哋食多過平時時，會同我哋講：今日好肚餓喎。
呢種人與人嘅關心，比起一百分重要得多，須知道，有一個人咁有你心係好難得，即使係佢工作都好，佢用嘅心你係會令佢感受到唔同。
諗返起當年讀書，自己連一百分都好少會拎到，合格已經還神，到今日出到嚟社會做野，唔合格你基本上係生存唔到，有七八十分你生活上都會好多煩惱，當你做到100分時，你先會叫唔駛點煩；但現實社會，當你做到超越一百分，做到比人哋預期得仲要多，用心去做一件事時，你就會發現每個細節都會令你幾何級咁提升。
今時今日睇返當年拎到合格就滿足嘅自己，真係覺得太年輕了，要追進度，都係自己積落嚟嘅債。
Search